Germaniýanyň kenarynda, Baltika deňziniň ýalpak ýerlerinde mart aýyndan bäri birnäçe gezek batyp galan 12 metrlik Timmi atly örküçli kit ahyry özbaşdak Demirgazyk deňzine ýüzüp gitdi. Bu barada Der Spiegel neşiri habar berýär.
Soňky günlerde deňiz biologlary we meýletinçiler kiti ýörite baržanyň kömegi bilen Baltika deňzinden Demirgazyk deňzine göçürmegiň ugruna çykypdylar. 2-nji maýda bolsa kit, entek hünärmenler ony iň soňky gezek barlamaga-da ýetişmänkäler, baržadan agdarylyp, açyk deňze çümüp gitdi. Birsalymdan Timminiň golaýrakda ýüzüp barýandygy görüldi.
Deňiz biology Fabian Ritter kitiň entek doly sagdyn däldigini aýdýar. Onuň ýalpak ýerlerde uzak wagtlap galandygy sebäpli, kadaly ýüzüp, iýmit tapyp biljekdigi gümana.
Halas ediş işleriniň hemaýatçysy Karin Waler-Mommertiň aýtmagyna görä, kit demirgazyk-günbatara tarap ugur aldy. Bu ýol ony Norwegiýanyň kenarlaryna we Arktika çykaryp biler.
Haýwanlary goraýan guramalar bolsa, eger Timmi Demirgazyk Atlantika baryp, şol ýerde-de uzak wagtlap diri galyp, özbaşdak iýmitlenip bilse, onuň doly halas edildigi bolar diýip hasaplaýarlar.
Şol sebäpli, häzirlikçe kitiň diri galmak mümkinçiligi, gynansak-da pesligine galýar.
Timmi mart aýyndan bäri Baltika deňziniň dürli ýerlerinde batyp gelýärdi. Hatda martyň ahyrynda kit bütinleý hereketini bes edende, resmi halas ediş işleri-de togtadylypdy. Emma meýletinçiler tagallalaryny dowam etdirdiler we 28-nji aprelde ony barža ýüklemegi başardylar. Göçürilýän wagty kitiň bedeninde ýeňil şikesler hem emele geldi.
