Günbatar Afrikadan Karib deňzine çenli takmynan 8000 kilometre uzalyp gidýän sargassum suwotylarynyň uly Atlantik guşagy ummanyň hemişelik ekoulgamyna öwrüldi. Howanyň üýtgemegi boýunça Ýewropa-Ortaýer deňzi merkeziniň ylmy işgärleri şeýle netijä geldiler.
Alymlar suwotylaryň 2011-nji ýyldaky gülleýişiniň gyş ýelleriniň güýçlenmegi we ýokumly maddalarynyň gelmegi bilen baglanyşykly bolandygyny, emma indi ulgamyň özüni özbaşdak goldap bilýändigini anykladylar. Suwda ýüzüp ýören suwotylaryň töwereginde organizmler jemgyýeti emele geldi, olar sargassumyň özünden çykýan azoty gaýtadan işläp, ony suwa gaýtaryp berýär we howa şertlerine garamazdan, dowamly ösüşi üpjün edýär.
Barlagyň maglumatlaryna görä, 2025-nji ýyla çenli guşagyň umumy biomassasy 37 million tonnadan geçer.
Hemra gözegçiliklerini we okeanografik modelleri ulanyp, barlagçylar 2023-nji we 2024-nji ýyllar üçin suwotylaryň konsentrasiýasyny çaklap bildiler. Bu bolsa, gyssagly ýagdaýda kenarýakany arassalamak işleriniň ýerine, olary açyk deňizde tutmak mümkinçiligini açýar.
Awtorlar sargassum kenarda çüýreýän wagty, toplanan uglerodyň ep-esli böleginiň atmosfera gaýtarylýandygyny belleýärler. Şol bir wagtyň özünde, suwotylary kenarýaka zolagynda ýygnap, soňra ony deňziň çuň ýerlerine taşlamak, asyrlaryň dowamynda uglerodyň uzak möhletli toplanmagyny üpjün edip biler.
Barlagçylaryň sözlerine görä, kenarýaka jemgyýetleri soňky 15 ýylyň dowamynda netijeli çaklama we utgaşdyrma gurallary bolmansoň, sargassum suwotylarynyň ýaýramagyndan uly zyýan çekdiler. Awtorlar indi bu hadysany meýilnamalaýyn dolandyrmak üçin ylmy esaslaryň dörändigine ynanýarlar.
