Türkmenistanyň zenan telekeçileriniň topary Pariž şäherinde geçirilen «Maison & Objet» we «Who's Next» halkara sergilerinde öz brendleriniň önümlerini tanyşdyrdylar. Bu sapar Halkara söwda merkezi tarapyndan Ýewropa Bileleşiginiň goldawy bilen, Türkmenistanyň söwda durnuklylygyny ýokarlandyrmak taslamasynyň çäklerinde guraldy diýip, Türkmenistan Halkara habarlar portaly habar berýär.
«Maison & Objet» hem-de «Who's Next» moda we dizaýn dünýäsinde Parižiň iň esasy wakalarynyň ikisidir.
«Maison & Objet» — esasan interýer, dekor we durmuş ýörelgesi (lifestyle) meselelerine üns berýär.
«Who's Next» — moda, aksessuarlar we täze moda trendleri boýunça ýöriteleşýär.
Şeýle abraýly çärelere gatnaşmaklyk ýerli kompaniýalara dünýäniň döredijilik senagatynyň öňdebaryjy meýdançasynda özlerini tanyşdyrmaga mümkinçilik berdi.
Wekiliýetiň düzümine «Binaym», «Shekil Studio/Ensi», «AYM» tikinçilik atelýeleri hem-de «Unique Camel Wool» brendiniň wekilleri girdi. Olar sergide diňe bir öz kolleksiýalaryny görkezmek bilen çäklenmän, eýsem önümleri eksporta taýýarlamagyň halkara standartlaryny, gaplamaga we sertifikatlaşdyrmaga bildirilýän talaplary öwrendiler.
Mümkin bolan hyzmatdaşlar we bilermenler bilen geçirilen gepleşikler türkmen telekeçilerine öz harytlarynyň Ýewropa bazaryndaky bäsdeşlige ukyplylygyna baha bermäge kömek etdi.
Brendleriň esaslandyryjylary Pariž meýdançalarynyň häzirki zaman marketingi we önüm tanyşdyrylyşy babatda gymmatly tejribe çeşmesine öwrülendigini bellediler.
