22-nji ýanwarda Russiýa Federasiýasynyň DIM-nde «Merkezi Aziýa – Russiýa» formatynyň ýokary derejeli geňeşmeleri geçirildi. Geňeşmeler 2025–2027-nji ýyllar üçin bilelikdäki hereketleriň meýilnamasyny durmuşa geçirmekligiň çäklerinde guraldy. Bu barada Türkmenistanyň DIM-niň saýtynda habar berilýär.
Türkmen wekiliýetiniň ýolbaşçysy, Türkmenistanyň ilçisi E.Aýdogdyýew öz çykyşynda geçen ýylyň oktýabrynda Duşenbede geçirilen Merkezi Aziýanyň we Russiýa Federasiýasynyň döwlet Baştutanlarynyň ikinji sammitinde Türkmenistanyň Prezidenti tarapyndan beýan edilen başlangyçlaryň iş ýüzünde durmuşa geçirilmeginiň möhümdigini belledi.
Türkmenistanyň durnuklylygy, ynamy we özara bähbitli hyzmatdaşlygy pugtalandyrmaga gönükdirilen amaly häsiýetli garaýyşlary we teklipleri goldaýandygy, bu garaýyşlaryň we teklipleriň deňhukuklylygy hem-de gatnaşyjylaryň milli bähbitlerini nazara almagyň möhümdigini göz öňünde tutýandygy aýratyn nygtaldy.
Taraplar Merkezi Aziýanyň we Russiýa Federasiýasynyň döwlet Baştutanlarynyň ikinji sammitiniň netijelerini durmuşa geçirmegiň mümkin bolan ýollaryny ara alyp maslahatlaşdylar. Munuň alty döwletiň ugurdaş ministrlikleriniň we beýleki hökümet guramalarynyň arasyndaky geňeşmeleri geçirmek arkaly hem mümkindigi bellenildi.
