21-nji ýanwarda Prezident Serdar Berdimuhamedow BMG-niň Azyk we oba hojalyk guramasynyň Baş direktory Suý Dunýuýy kabul etdi. Bu barada “Watan” habarlar gepleşiginde habar berildi.
Duşuşygyň barşynda bellenilişi ýaly, ýurdumyz ählumumy azyk howpsuzlygyny pugtalandyrmaga, tebigy serişdeleri durnukly dolandyrmaga goşant goşýar, dünýä jemgyýetçiliginiň möhüm howa we daşky gurşaw meselelerini çözmäge gönükdirilen başlangyçlaryny we tagallalaryny goldaýar. Türkmenistan ýer we suw serişdelerini netijeli peýdalanmaga hem-de ekologiýa meselelerine üns bermek bilen, oba hojalyk ulgamyny dolandyrmagy kämilleşdirýär. Şeýle hem oba hojalyk önümleriniň hilini ýokarlandyrmak we möçberini artdyrmak maksady bilen, sanly tehnologiýalary önümçilige ornaşdyrýar.
Serdar Berdimuhamedow ýurdumyz bilen FAO-nyň arasyndaky hyzmatdaşlyk barada aýdyp, häzirki wagtda oba hojalyk pudagyny döwrebaplaşdyrmaga gönükdirilen birnäçe taslamalaryň amala aşyrylýandygyny belledi.
Bellenilişi ýaly, Türkmenistanda FAO-nyň goldawy bilen oba hojalygynyň netijeliligini ýokarlandyrmaga hem-de ýer serişdelerini dolandyrmagy kämilleşdirmäge gönükdirilen taslamalar üstünlikli amala aşyryldy hem-de häzirki zaman tehnologiýalary ornaşdyryldy. Mundan başga-da, oba hojalyk ekinlerini goramak boýunça milli we sebit derejesinde tagallalary pugtalandyrmaga gönükdirilen taslamalar ýerine ýetirilýär. “Ýaşyl howa” gaznasynyň çäklerindäki başlangyçlar we “Bitewi saglyk” çemeleşmesi hem durmuşa geçirilýär.
Şunuň bilen baglylykda, döwlet Baştutany Türkmenistanyň Azyk we oba hojalyk guramasy bilen hyzmatdaşlygy mundan beýläk-de giňeltmäge taýýardygyny tassyklady.
