Tunisden Zubeýr Jlassi 1 Billion Followers Summit sammitinde dokuz minutlyk Lily filmi üçin AI Film Award baş baýragyny – 1 million dollar aldy diýip, Creapills habar berýär. Bäsleşik 2026-njy ýylyň 9 – 11-nji ýanwarynda Dubaýda geçirildi we wizual hatary döretmek üçin EA ulanylan ilkinji uly festiwal boldy.
Guramaçylar 116 ýurtdan gelip gowşan 3500 arzadan 12 finalçyny saýlady. Eminler diňe bir tehniki çylşyrymlylyga däl, eýsem innowasiýanyň, sýužetiň we etikanyň utgaşygyna baha berdi. Çäräniň hyzmatdaşy hökmünde döredijilik işinde neýroulgamlara jogapkärli çemeleşmäni goldaýan Google Gemini çykyş etdi.
Lily filmi atmosferasy we ownujak zatlara ünsüň berilmegi bilen beýlekilerden tapawutlandy. Jlassi emeli aňy režissýoryň ornuny tutmak üçin däl-de, ýagtylygy, kadr kompozisiýasyny we sahna ýagdaýyny dolandyrmak üçin gural hökmünde ulandy. Filmiň sahnalarynda Tunisi tanamak bolýar: binagärlik, reňkler we hojalyk predmetleri tanyş atmosferany döredýär.
Eminler filmiň duýgy döredýändigini belledi: tomaşaçy EA-nyň effektlerine syn etmän, gahrymanlara duýgudaşlyk bildirýär. Bu ýeňiş afrikaly režissýorlaryň medeni özboluşlylygy täze media bilen utgaşdyryp, tehnologiýa merkezlerindäki awtorlar bilen bäsleşip biljekdigini görkezýär.
