Režissýor Ýoakim Trieriň «Duýgy gymmatlygy» (Сентиментальная ценность) dramasy «Iň gowy film» kategoriýasynda Ýewropa kinoakademiýasynyň baýragyny aldy. Dabara Berlindäki Dünýä medeniýetleriniň öýünde geçirildi.
Film alty baýraga mynasyp bolup, agşamyň iň esasy ýeňijisi boldy. Ol «Iň gowy režissýor», «Iň gowy ssenariçi», «Iň gowy aktrisa» (Renate Reinswe), «Iň gowy aktýor» (Stellan Skarsgard) we «Iň gowy saundtrek» kategoriýalarynda-da öňe saýlandy.
Ozal «Duýgy gymmatlygy» 2025-nji ýylda Kann kinofestiwalynyň Gran-prisini alypdy.
Sýužetiň merkezinde ençeme ýyl bäri umumy dil tapyşyp bilmeýän kaka bilen gyzynyň arasyndaky gatnaşyk durýar. Renate Reinsweniň gahrymany öz režissýor kakasynyň täze filminde düşmek teklibini alýan tanymal teatr aktrisasy bolýar. Olaryň gatnaşygy kakasynyň köp ýyl mundan ozal maşgaladan gitmegi sebäpli çylşyrymlaşýar.
Şeýle-de, režissýor Oliwer Laşeniň «Sirat» ispan filmi Ýewropa kinoakademiýasynyň bäş baýragyny aldy. Bu film montaž, operatorlyk işi, hudožnik-ýola goýujynyň işi, saund-dizaýn we kasting üçin baýraklara mynasyp boldy. Film ozal Kann kinofestiwalynda eminler baýragyny alypdy.
Iň gowy kostýum dizaýny üçin baýragy režissýor Maşa Şilinskiniň «Ýykylmagyň sesi» nemes filmi aldy.
Ýewropa kinoakademiýasynyň hormat baýraklary norwegiýaly aktrisa Liw Ulmana (ömründe gazanan üstünlikleri üçin) we italiýaly režissýor Aliçe Rorwahere (dünýä kinematografyna goşan goşandy üçin) berildi.
Ýewropa kinoakademiýasynyň baýragy «Oskaryň» Ýewropadaky görnüşidir. Ilkinji gezek kinematografçylar bu baýragy 1988-nji ýylda aldy. Baýragyň indiki gowşurylyş dabarasy 2027-nji ýylyň ýanwarynda Gresiýanyň paýtagty Afinyda geçiriler.
