18-nji ýanwarda uly çille öz ornuny kiçi çillä berdi. Bu möwsüm 7-nji fewrala çenli dowam eder.
«Gaharjaň», «keçjal» diýen atlary alan kiçi çille bu ýyl hem özüniň gar-ýagşy bilen geldi. Ýakyn günleriň howa maglumatlary muňa şaýatlyk edýär. Muňa garamazdan, gyş ortadan agandygy üçin onuň galan böleginiň-de maýyllyk bilen geçmegine garaşylýar. Sebäbi bu ýyl ýylky ýyly bolansoň, bedewler sowugy halap baranoklar.
Kiçi çilläniň howasy durnuksyz bolýar. Käte asmanyň ýüzi bulutdan dolup, gar ýagsa, onuň yz ýanyndan ähli bulutlar syrylyp, aýaz hem boluberýär. Şeýle ýagdaýda eýýäm kemsiz agralan ene mallara ýyly kaşar, ýyly suw we goşmaça ot-iým zerurlygy has-da artýar. Diňe şonda olardan sagdyn guzy alyp bolýar. «Malym — janym» diýip, özüniň bar yhlasyny, zähmetini bakýan mallaryna siňdirýän çopanlar dürli usullary, ata-babalarymyzdan galan tejribeleri ulanmak bilen, ene goýunlary şu döwürde aýratyn alada bilen gurşap alýarlar. Gyşyň uzak gijelerinde aýagy üşemez ýaly, ýatan mallary 1-2 gezek örüzip ot bermeseň, sürüde agsap ýören mal köpelýär.
Bu ýyl iki çilläniň sepgidinde ýagan gar-ýagyş maldar üçin käbir kynçylyklary döretse-de, ol daýhan üçin bähbitli boldy. Çille döwrüniň ýagmyry topraga bereket bolup siňýär. Hut şonuň üçin-de «Çille gary — ýeriň gany» diýilýär. Eger-de çillede ýagan gar ýedi günläp ýeriň ýüzünde eremän ýatsa oňat görlüpdir. Şeýle ýagdaýda güýzlük bugdaý maýsalaryna-da dökün berlen ýaly bolýar.
Şu döwürde ýyldyzlar äleminde hem käbir üýtgeşmeler bolup geçýär, ýagny Aralyk ýyldyzy ilkagşam peýda bolup, ol daňdan ýaşýar. Ýaldyrak, Mizan hem hatar gurap gündogardan günbatara süýşýär. Ýyldyzlaryň şu hereketi kiçi çille döwründe has-da äşgär duýulýar.
