Eýran Yslam Respublikasynyň (EYR) Türkmenistandaky ilçisi Aly Mojtaba Ruzbehani we EYR-nyň medeniýet geňeşçisi Abdolreza Abbasi Döwletmämmet Azady adyndaky Türkmen milli dünýä dilleri institutynda hem-de Türkmenistanyň Döwlet medeniýet merkeziniň Döwlet kitaphanasynda duşuşyklar geçirdiler.
Dünýä dilleri institutynda goňşy ýurduň wekilleri ýokary okuw mekdebiniň rektory bilen gepleşikleri geçirdiler, şeýle hem pars dilini öwrenýän talyplar we mugallymlar bilen söhbetdeş boldular. Taraplar ylym-bilim we medeni hyzmatdaşlygy giňeltmegiň mümkinçiliklerini seljerdiler. Gepleşikleriň dowamynda pars dili boýunça mugallymlaryň hünärini ýokarlandyryş okuwlaryny we talyplaryň dil endiklerini kämilleşdirmek üçin amaly sapaklary guramak meseleleri ara alnyp maslahatlaşyldy.
Eýranyň Medeniýet merkezi tarapyndan instituta gymmatly kitaplar sowgat berildi. Olaryň arasynda Sadi Şiraziniň türkmen dilindäki eserleri, Mollanepesiň we Nurmuhammet Andalybyň pars dilindäki goşgular ýygyndylary, şeýle hem pars dili boýunça döwrebap okuw we usuly gollanmalar bar.
Türkmenistanyň Döwlet kitaphanasynda Eýran wekilleri edaranyň ýolbaşçysy Laçyn Nurmuhammedowa bilen duşuşdylar. Duşuşykda medeniýet, ylym we bilim ulgamlaryndaky hyzmatdaşlygyň geljegi barada pikir alşyldy.
Myhmanlara kitaphananyň gaznasyndaky pars dilli edebiýatlar, Türkmenistanyň Halk Maslahatynyň Başlygy Gurbanguly Berdimuhamedowyň we Türkmenistanyň Prezidenti Serdar Berdimuhamedowyň daşary ýurt dillerine terjime edilen eserleri, şeýle hem gadymy golýazmalar we seýrek duş gelýän neşirler görkezildi.
Saparyň ahyrynda geňeşçi Abdolreza Abbasi Eýranyň Medeniýet merkeziniň adyndan kitaphananyň daşary ýurt edebiýaty gaznasyny baýlaşdyrmak üçin pars dilindäki 40-dan gowrak neşiri sowgat berdi.
