Hytaýyň Uhan şäherinde 26-njy fewralda lukmanlaryň «täsinden täsin» diýlip atlandyran hadysasy bolup geçdi. Sinzýan-Uýgur awtonom sebitiniň 24 ýaşly Dili atly ýaşaýjysy birbada bäş çaganyň — dört gyzyň we bir oglanyň enesi boldy. Tebigy göwrelilikde şeýle wakanyň bolmak ähtimallygy örän pes bolup, hünärmenler muny 60 million ýagdaýdan 1 gezek diýip hasaplaýar. Bu barada Global Times habar berýär.
Çagalaryň wagtyndan öň (göwreliligiň 28-nji hepdesinde) dünýä inendigine garamazdan, olaryň ýagdaýy kadaly. Täze doglan bäşemleriň agramy 870 gramdan 1030 grama çenli üýtgeýär. Bu ýagdaýyň ýene bir özboluşlylygy bäş çaganyň hemmesiniň Apgar şkalasy boýunça 6 baldan ýokary bal almagydyr, bu bolsa wagtyndan öň we aşa az agramly doglan çagalar üçin seýrek duş gelýän görkezijidir.
Dogum 20-den gowrak lukmançylyk hünärmeninden ybarat toparyň gatnaşmagynda gyssagly kesar kesimi arkaly geçirildi we bir sagada golaý wagt dowam etdi.
Hadysanyň aýratyn geň galdyrýan ýeri, Dilä ozal göwrede çaganyň galmagyny kynlaşdyrýan we çaga düşme töwekgelçiligini artdyrýan ýumurtgalyklaryň polikistoz sindromy diýen diagnoz goýlupdy.
Emma Sinzýanyň ýerli hassahanasynda bejergi alandan soň, göwrelilik tebigy usulda boldy. Häzirki wagtda ene adaty palatada saglygyny dikeldýär, bäşemler bolsa täze doglan çagalaryň intensiw bejergi bölüminde lukmanlaryň gözegçiliginde saklanýar.
