Ýaponiýanyň Osaka şäherinde adynyň aýdylmagyny islemedik sahawatly bir adam şäheriň suw üpjünçilik ulgamyny täzeletmek üçin 21 kilogram altyn böleklerini peşgeş berdi. Osakanyň häkimi Hideýuki Ýokoýamanyň gürrüň bermegine görä, altynlar şäheriň suw üpjünçilik müdiriýetine tabşyryldy we olaryň satuwyndan geljek serişdeleri könelen suw turbalaryny bejermek üçin ulanmak meýilleşdirilýär.
Häkim tabşyrylan altyn bölekleriniň bahasynyň takmynan 560 million iýena (3,6 million dollar töweregi) barabardygyny aýdýar. Haýyr-sahawatçy kişi öz adynyň gizlin galmagyny isläpdir we şäher häkimligi hem onuň bu haýyşyny berjaý edýär.
«Bu örän ähmiýetli we uly mukdardaky serişde. Suw turbalaryny bejermek ägirt köp serişdeleri talap edýär, şonuň üçin hem bu jomart adama minnetdarlygymy aýtmaga söz tapmaýaryn» diýip, şäher häkimi begenjini mälim etdi.
Resmileriň aýtmagyna görä, bu peşgeş geçen ýylyň noýabr aýynda gelip gowuşypdyr. Edil şu sahawatçy mundan bir aý öň hem suw ulgamynyň zerurlyklary üçin 3 300 dollar töweregi pul geçiripdir.
Ýaponiýanyň suw üpjünçilik infrastrukturasy esasan uruşdan soňky ykdysady ösüş döwründe gurlupdy. 3 milliona golaý ilaty bolan Osakada ulgamlaryň bir böleginiň has ir gurlanlygy sebäpli, könelme derejesi beýleki şäherleriňkiden has ýokarydyr. 2025-nji ýyla çenli şäherde suw geçirijileriniň 92 böleginde näsazlyk hasaba alyndy, 266 kilometr turba bolsa gyssagly çalşylmaga mätäç ýagdaýdadyr.
