Ýaponiýanyň iň günorta sebiti bolan Okinawa özi bilen güýçli ýagyşlary, harasatlary we güýçli tupanly ýelleri äkeljek «Jangmi» taýfunynyň gelmegine taýýarlyk görýär. Ýurduň Meteorologiýa gullugy süýşgünleriň we ägirt uly tolkunlaryň döreme howpuny göz öňünde tutup, ýerli ýaşaýjylara ätiýaçlyk çärelerini berjaý etmegi maslahat berdi.
Maslahat beriji edaranyň maglumatlaryna görä, ýeliň tizliginiň sagatda 162 kilometre ýetmegi ähtimal. Sişenbe güni taýfun Amami sebitine tarap süýşer we şondan soň bolsa ugruny demirgazyk-gündogara üýtgedip, Ýaponiýanyň esasy böleginiň Ýuwaş umman kenarýakasynyň boýy bilen geçip biler.
Okinawa we Amami sebitleriniň käbir ýerlerinde gartaşan adamlara hem-de taýýarlyk görmek üçin has köp wagt talap edilýän ýaşaýjylara öňünden howpsuz ýerlere göçmek maslahat berildi. Ähli ýaşaýjylara zerurlyk bolmasa saparlara çykmazlyk we aýratyn seresaplygy saklamak tabşyrylýar.
Çarşenbe güni hem Tokionyň ýerleşýän ýeri bolan Kanto sebitinde güýçli ýagynlaryň ýagmagyna garaşylýar. Taýfunyň golaýlaşmagy sebäpli 400-den gowrak uçuş ýatyryldy. Olaryň agramly bölegi All Nippon Airways awiakompaniýasynyň Okinawa gidişin hem gaýdyşyn gatnawlarydyr.
Ýaponiýanyň Meteorologiýa müdiriýetiniň maglumatynda aýdylyşy ýaly, «Jangmi» ýylyň başyndan bäri hasaba alnan altynjy taýfundyr. 2025-nji ýylda Ýaponiýanyň üstünden 27 sany taýfun geçipdi, bu bolsa adaty ýyllyk ortaçala görkeziji bolan 25-den has ýokarydyr.
