Gurbanguly Berdimuhamedow adyndaky haýyr-sahawat gaznasynyň 5 ýyllygyna taýýarlyk ara alnyp maslahatlaşyldy

28-nji fewralda Arkadag şäherine amala aşyran iş saparynyň dowamynda Halk Maslahatynyň Başlygy Gurbanguly Berdimuhamedow iş maslahatyny geçirdi. Maslahat şäheri ösdürmegiň häzirki zaman meselelerine we öňde duran çärelere taýýarlyk görmäge bagyşlandy. Oňa Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D. Orazow we Arkadag şäheriniň häkimi G. Mämmedowa gatnaşdy diýip, «Watan» habarlar gepleşigi habar berdi.
Maslahatda 2026-njy ýylda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmegine 5 ýyl dolýandygy bellenildi. Şunuň bilen baglylykda, Gaznanyň bu senesine bagyşlanan dabaralaryň meýilnamasyny taýýarlamak tabşyryldy.
Dabaralara döredijilik toparlaryny çekmek, Aşgabat we Arkadag şäherlerinde geçiriljek medeni çäreleri işläp taýýarlamak meýilleşdirilýär. Bu çäreler Gaznanyň çagalaryň saglygyny we olary durmuş taýdan goramak ulgamyndaky alyp baran işleriniň netijelerini görkezmäge gönükdiriler.
Häkim G. Mämmedowa Halkara zenanlar gününi baýram etmäge görülýän taýýarlyklar barada hem hasabat berdi. Baýramçylyk mynasybetli köp çagaly eneleri hormatlamak we maşgalalaryň täze ýaşaýyş jaýlaryna göçüp gelmek dabaralaryny geçirmek meýilleşdirilýär.
Halk Maslahatynyň Başlygy baýramçylyk çäreleriniň we jaý toýlarynyň ýokary guramaçylyk derejesini üpjün etmegi tabşyrdy.