«Barselona» futbol kluby mundan iki ýyl ozal hüjümçi Lamin Ýamal üçin «Pari Sen-Žermeniň» hödürlän 250 million ýewrolyk transfer teklibini ret etdi. Bu maglumaty katalon klubynyň öňki prezidenti Žoan Laporta tassyklady.
«Mundan iki ýyl ozal PSŽ bize Lamin Ýamal üçin 250 million ýewro hödürledi. Biz bu teklipden ýüz öwürdik. Şol wagt Ýamal 17 ýaşyndady. Käbir adamlar bize aklymyzdan azaşandyrys öýdüpdiler» diýip, Laporta gürrüň berdi. Onuň bu sözlerini žurnalist Fabrisio Romano paýlaşdy.
Häzir Lamin Ýamal 18 ýaşynda. Ol «Barselonanyň» öz akademiýasynyň ýetişdiren oýunçysy bolup, 2023-nji ýylyň aprelinden bäri klubyň esasy düzüminde çykyş edýär. Futbolçy ilkinji gezek meýdança ýaňy bir 15 ýaşyndaka çykypdy.
Arzyly futbolçy şu möwsümde ähli ýaryşlarda 33 oýna gatnaşyp, 15 gol geçirdi we 14 assist etdi.
2024/25-nji ýyllar möwsüminde ol «Barselonanyň» düzüminde Ispaniýanyň çempionlygyny, Kubogyny we Superkubogyny gazandy. 2024-nji ýylda Ispaniýanyň milli ýygyndysy bilen Ýewropa çempiony boldy.
Häzirki wagtda «Barselona» 61 utuk bilen Ispaniýanyň La Ligasynyň ýaryş jedwelinde birinji orunda barýar.
Žoan Laporta fewralyň başynda katalon klubunyň täze prezident saýlawlaryna gatnaşmak üçin wezipesinden çekilipdi. Saýlawlar 15-nji martda geçiriler, ýeňiji bolsa 1-nji iýuldan resmi taýdan öz wezipesine girişer.
