«Galkynyş» milli at üstündäki oýunlar topary ýurt boýunça dabaraly ýörişiniň çäginde Mary welaýatynda çykyş etdi. Mundan ozal döredijilik topary Arkadag şäherinde, şeýle hem Balkan, Daşoguz we Lebap welaýatlarynda boldy.
Bu dabaraly ýöriş toparyň ýanwar aýynda Monte-Karloda geçirilen 48-nji Halkara sirk sungaty festiwalynda gazanan üstünliklerine bagyşlandy. Ol ýerde topar sirk pudagyny ösdürmäge goşan goşantlary üçin Bütindünýä sirk federasiýasynyň we Ýewropa sirk assosiasiýasynyň şahadatnamalaryna mynasyp boldy.
Mary şäherinde toparyň agzalary Garaşsyzlyk köçesiniň ugrunda baýramçylyk ýörişini gurap, welaýat kitaphanasyna baryp gördi we bu ýerde guralan sergi bilen tanyşdy. Esasy dabaralar «Türkmeniň ak öýi» binasynda boldy. Binanyň öňündäki meýdançada ak öýleriň tärimleri gurnalyp, at esbaplary we şekillendiriş sungatynyň eserleri ýerleşdirildi.
Çykyşlar ahalteke bedewleriniň gatnaşmagyndaky akrobatik oýunlary hem öz içine aldy. Tomaşaçylara jigitlik sungatynyň çylşyrymly tilsimleri we at üstündäki oýunlar görkezildi. Medeni çäräniň ahyrynda gatnaşyjylar Türkmenistanyň Prezidentine Ýüzlenme kabul etdi, şondan soňra agzaçar sadakasy berildi.
