Özbegistanyň prezidenti Şawkat Mirziýoýew Sankt-Peterburgda penjireden aşak gaçan çagany halas eden ildeşi Haýrullo Ibadullaýewi «Jasorat» («Edermenlik») medaly bilen sylaglady. Bu barada döwlet baştutanynyň metbugat sekretary Şerzod Asadow habar berdi. Degişli perman prezidentiň resmi saýtynda çap edildi.
Prezidentiň wekiliniň belleýşine görä, Haýrullo çagany halas eden wagty öz janyna hem-de saglygyna töwekgelçilik edip, hakyky batyrlyk hem pidakärlik görkezdi. Ibadullaýew bu edermenligi bilen özbek halkyna mahsus bolan edermenligi we gahrymançylygy dünýä ýaýdy.
Waka şeýle bolup geçýär: Sankt-Peterburgda alty ýaşly oglanjyk açyk duran penjiräň öňünde planşet oýnap otyrka, köp gatly jaýyň ýedinji gatyndan aşak gaçýar. Muny şol ýerde işläp ýören Haýrullo Ibadullaýew görýär-de, çagany döşüne gapyp, ony ýere ýetmänkä urgyny ýumşadyp ýetişipdir. Gorkan çaga ilkinji kömegi bereninden soň, ol «tiz kömek» gelýänçä ony jaýyň gözegçisine tabşyrýar. Çagany halas etjek bolan wagtynda Haýrullonyň gapyrgalary döwlendigi, oglanjygyň hem aýagyna şikes ýetendigi aýdylýar.
Wakanyň bolan pursadynda oglanjygyň ejesi öýde bolsa-da, oglundan bihabar başga otagda işleri bilen gümra ekeni. Metbugat maglumatlaryna görä, çaga autizmden ejir çekýär.
Haýrullonyň özi - dört çaganyň kakasy. Olar onuň aýaly hem-de garry ene-atasy bilen ýaşaýar.
