Saud Arabystanynyň «Al-Nasr» klubunyň hüjümçisi Kriştianu Ronaldu özüniň geljekki meýilnamalary barada durup geçdi we karýerasyny bu ýurtda dowam etdirmek isleýändigini tassyklady. Bu barada insaýder Fabrisio Romano habar berýär.
Milli çempionatyň (Pro-Liga) 23-nji tapgyrynda «Al-Hazm» toparyna garşy geçirilen we «Al-Nasryň» 4:0 hasabyndaky ýeňşi bilen tamamlanan oýundan soň, 41 ýaşly ýyldyz futbolçy : «Men Saud Arabystanyna degişli. Bu ýerde oýunlarymy dowam etdirmek isleýärin. Bu ýurt meni, maşgalamy we dostlarymy örän gowy garşy aldy. Men bu ýerde bagtly we galmak isleýärin».
Ýakynda ABŞ-nyň Prezidenti Donald Trampyň Ronaldony Amerikanyň Birleşen Ştatlaryna çagyrandygy baradaky habarlar we emeli aň arkaly döredilen wideolar meşhurlyk gazanypdy. Şeýle-de, metbugatda portugaliýaly hüjümçiniň klubuň transfer syýasatyndan nägile bolup, käbir oýunlara gatnaşmakdan ýüz öwrendigi (baýkot edendigi) barada maglumatlar ýaýrapdy. Emma Ronaldunyň soňky beýanaty bu şübheleri aradan aýyrdy.
41 ýaşyna garamazdan, Ronaldu meýdançada ýokary netijeliligini görkezmegini dowam edýär: Soňky oýunda «Al-Hazm» bilen duşuşykda dubl (2 gol) etdi.
Ähli ýaryşlarda 22 oýna gatnaşyp, 20 gol geçirmegi başardy. Häzirki wagtda «Al-Nasr» 21 oýundan soň 52 utuk bilen çempionatda 3-nji orunda barýar. Ýaryşyň lideri — 53 utugy bolan «Al-Hilal» toparydyr.
