ABŞ-nyň prezidenti Donald Tramp ýurduň goranmak ministrine we beýleki degişli edaralara Ýerden daşardaky ýaşaýyş, howadaky nämälim hadysalar we uçýan obýektler bilen baglanyşykly döwletde bar bolan materiallary ýüze çykarmagy hem-de olary gizlinlikden aýyrmagy tabşyrdy. Bu barada ol özüniň Truth Social jemgyýetçilik torunda ýazdy.
Tramp beýle kararyň bu meselelere bolan uly jemgyýetçilik gyzyklanmasy bilen baglydygyny we olaryň çylşyrymlylygy hem wajyplygy bilen düşündirýär. Şeýle-de bolsa pezident resminamalaryň çap edilip bilinjek anyk möhleti aýan etmedi.
Ýaňy-ýakynda ABŞ-nyň öňki prezidenti Barak Obama amerikan häkimiýetleriniň harby bazalarda, şol sanda daşynda köp sanly konspirologik teoriýalar bolan «51-nji zolak» bazasynda gaýry planetalardan gelmişekleriň saklanmaýandygyny mälim edipdi. Ol bloger Braýan Taýler bilen bolan söhbetdeşliginde bu bazanyň aşagyndaky ýerasty desgalar baradaky çaklamalaryň diňe maglumatlary hatda prezidentiň özünden hem gizleýän örän uly dildüwşük bar bolan ýagdaýynda mümkin bolup biljekdigini belledi.
Obama biraz wagt soň, bu sözleriniň sosial torlarda giň seslenme dörendigi sebäpli, Älemiň çäksiz gurluşyny nazara alanyňda, Ýeriň daşynda hem ýaşaýşyň bolup biljekdigi hakyndaky pikiri orta atdy. Şol bir wagtda-da, Ak tamda işlän döwründe gelmişekler bilen hiç haçan ýüzbe-ýüz bolmandygyny hem nygtady.
