Halk Maslahatynyň Başlygy Ahalteke atçylyk toplumyna baryp gördi we atly gezelenç etdi

28-nji fewralda Arkadag şäherine amala aşyran saparynyň dowamynda Türkmenistanyň Halk Maslahatynyň Başlygy Gurbanguly Berdimuhamedow Ahalteke atçylyk toplumyna baryp gördi. Ol ýerde Milli Lider Hanbeg atly bedewe atlanyp, birsellem gezim etdi diýip, «Watan» habarlar gepleşigi habar berdi.
Saparyň dowamynda ahalteke bedewleriniň milli gymmatlyk we ýurduň esasy nyşanlarynyň biri hökmündäki ähmiýeti nygtaldy. Türkmenistanyň ahalteke atlarynyň mekany hökmünde atçylyk ulgamynda halkara hyzmatdaşlygyny işjeň ösdürýändigi, bu ugurda yzygiderli maslahatlary we forumlary kabul edýändigi bellenildi.
Halk Maslahatynyň Başlygy geçen ýylyň jemlerine bagyşlanyp geçirilen Ministrler Kabinetiniň mejlisinde 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi mynasybetli atçylyk we atly sport ugurlary boýunça çäreleriň Maksatnamasynyň tassyklanylandygyny belledi.
Şu Maksatnamanyň çäginde ahalteke bedewleriniň halkara gözellik bäsleşigini we daşary ýurtly hünärmenleriň gatnaşmagynda birnäçe ylmy maslahatlary geçirmek meýilleşdirilýär. Çärelere degişli ugur boýunça bilim alýan talyp ýaşlary işjeň çekmek göz öňünde tutulýar.
Saparyň ahyrynda Gurbanguly Berdimuhamedow degişli ýolbaşçylara maslahatlaryny berdi we olara işlerinde üstünlik arzuw edip, bu ýerden ugrady.