Apple kompaniýasy 2025-nji ýylyň netijeleri boýunça dünýäde smartfon üpjünçiligi ugrunda birinji orny eýeledi. Şunlukda, amerikan korporasiýasy 14 ýylyň içinde ilkinji gezek özüniň esasy bäsdeşi bolan Samsung-dan öňe geçmegi başardy.
Counterpoint Research seljeriş merkeziniň maglumatlaryna görä, Apple-iň dünýä smartfon bazaryndaky paýy 20%-e ýetdi we önüm üpjünçiligi 10% ýokarlandy. Günorta Koreýanyň tehnologiýa ägirdi bolsa 19% paý we 5% ösüş bilen ikinji orna düşdi.
Seljeriji Warun Mişranyň düşündirişine görä, Apple-iň bu üstünligine iPhone 17-niň satuwy hem-de Ýaponiýada, Hindistanda we Günorta-Gündogar Aziýa ýurtlarynda iPhone 16 modeline bolan durnukly isleg sebäp boldy.
"Bu goşa itergi COVID döwründäki enjamlaryň täzelenme sikliniň iň ýokary nokada ýetmegi bilen has-da güýçlendi, sebäbi millionlarça ulanyjy öz köne enjamlaryny täzelemeli boldy" diýip, ol sözüniň üstüni ýetirdi.
Global bazardaky beýleki orunlar:
- Xiaomi: 13% paý (3-nji orun).
- Vivo we OPPO: her biri 8% paý.
- Beýleki öndürijiler: umumy üpjünçiligiň 32%-i.
Analitikler, şeýle-de, üpjünçiliklerini degişlilikde 31% we 25% artdyran Nothing hem-de Google kompaniýalarynyň netijelerini aýratyn belläp geçdiler.
Umuman alanyňda, dünýä boýunça smartfon üpjünçiligi 2% ýokarlandy. Emma bilermenler çip ýetmezçiligi we şaýlaryň gymmatlamagy sebäpli 2026-njy ýylda bazaryň pese gaçyp biljekdigini duýdurýarlar. Şeýle ýagdaýda Apple we Samsung premium segmentdäki durnuklylygy we ygtybarly üpjünçilik zynjyrlary arkaly öz pozisiýalaryny saklap galar diýip garaşylýar. Barlaglaryň direktory Tarun Pathagyň habar bermegine görä, şu çaklamalaryň fonunda eýýäm smartfonlaryň bahalary gymmatlap başlady.
