Türkmenistanda Türkiýäniň täze wiza merkezi — «Mosaic Visa» açylar. Bu merkez Türkiýe Respublikasyna wiza almak üçin berilýän arzalary kabul edýän resmi operator bolar. Kompaniýanyň sosial ulgamlary arkaly beren maglumatyna görä, ol ýurdumyzda öz işini bes eden «Gateway International» merkeziniň ornuny tutar.
Resminamalary iki usulda - onlaýn portal arkaly ýa-da Aşgabat şäheriniň G. Kulyýew köçesiniň (2127-nji köçe) 71-nji jaýynda («MB» söwda merkezi) ýerleşýän wiza merkezine şahsy barmak arkaly tabşyryp bolar.
Mundan öňki «Gateway International» arkaly tabşyrylan arzalar öz güýjüni saklaýar we olar bellenilen tertipde serediler. 12-nji ýanwardan başlap, täze arzalar diňe öňünden ýazylyşyk esasynda kabul edilýär.
«Mosaic Visa» Türkiýäniň konsullyk edaralarynyň ýanyndaky ygtyýarlandyrylan merkezdir. Bu ýerde Türkmenistanyň raýatlary syýahatçylyk, iş, talyplyk, işewürlik, üstaşyr we beýleki wiza görnüşlerini resmileşdirip bilerler.
Merkez konsullygyň wiza bermek baradaky kararyna täsir edip bilmeýär. Hyzmat tölegleri, netijesine garamazdan, yzyna gaýtarylmaýar.
Iş tertibi:
- Duşenbe–Anna: 09:00-dan 17:00-a çenli.
- Remezan aýynda: 09:00-dan 14:00-a çenli.
Ýatladyp geçsek, Türkmenistan bilen Türkiýäniň arasyndaky wiza düzgüni 2022-nji ýylyň 13-nji sentýabryndan bäri hereket edýär. «Gateway International» merkezi bolsa şol günüň ertesi işe başlapdy.
