Tomsk politehniki uniwersitetiniň (TPU) alymlary kümüş nanobölejikleriniň süýji keseline garşy (antidiabetik) häsiýetlere eýedigini anykladylar. TASS agentliginiň TPU-nyň metbugat gullugyna salgylanyp habar bermegine görä, olar häzirki wagtda giňden ulanylýan dermanlardan 167 esse az dozada şol bir täsiri görkezýärler.
"TPU-nyň himikleri halkara kärdeşleri bilen bilelikde, uniwersitetiň alymlarynyň gatnaşmagynda işlenip düzülen 'Argowit' (Argovit) atly kümüş nanobölejikli derman serişdesiniň antidiabetik häsiýetlerini tejribe arkaly subut etdiler" diýip, ýokary okuw mekdebi belledi.
Barlagçylar öz işlerinde kümüş nanobölejikleriniň 2-nji görnüşli süýji keseline (diabete) täsirini öwrendiler. Tejribeler öýjük setirlerinde, gemrijilerde, şeýle hem maşyn öwrenme usullaryny ulanmak arkaly geçirildi. Netijeler kümüş nanobölejikleriniň α-amilaza, α-glýukozidaza we DPP-4 fermentleriniň işjeňligini häzirki dermanlara garanyňda degişlilikde 3,5, 3,824 we 11 esse has netijeli bäs gelýändigini (peseldýändigini) görkezdi.
"Mundan başga-da, kümüş nanobölejikleri glikasiýanyň soňky önümleriniň (AGEs) emele gelmegini, birinji hatardaky giňden ulanylýan derman bilen deňeşdirilende, 61 esse netijeli bäsledi" diýip, barlagyň awtorlarynyň biri, professor Alekseý Pestrýakow belledi.
Bu ylmy barlaga Russiýanyň we Meksikanyň alymlary gatnaşdylar. Ylmy açyşyň netijeleri abraýly "Nanoscale" žurnalynda çap edildi.
