1-nji ýanwardan başlap, Bolgariýa resmi taýdan ýewro pul birligine geçdi. Bir aýyň dowamynda ýurtda iki walýutanyň — ýewronyň we bolgar lewiniň parallel dolanyşygy hereket eder. Şondan soň milli walýuta dolanyşykdan doly çykarylar. Walýutanyň resmi kursy 1 ýewro üçin 1,95583 bolgar lewi möçberinde bellenildi.
Bolgariýanyň "24chasa" portalynyň habar bermegine görä, bahalaryň hökmany suratda iki pul birliginde — lewde we ýewroda görkezilmegi 2026-njy ýylyň 8-nji awgustyna çenli dowam eder. Bu çäre raýatlaryň täze walýuta uýgunlaşmagyny ýeňilleşdirmek üçin niýetlenendir.
Bu geçiş Bolgariýanyň Ýewropa Bileleşiginiň 27 agza ýurdunyň arasynda ýewro zolagyna goşulan 21-nji döwlet bolandygyny aňladýar. Ýewropanyň Merkezi banky (ÝMB) ýurduň bitewi ýewropa walýutasyny kabul etmek üçin ähli zerur şertleri (kriteriýalary) ýerine ýetirendigini belleýär. Şeýle hem, ýewro zolagyna agzalyk Bolgariýa pul-karz syýasaty boýunça çözgütleri kabul edýän ÝMB-niň Dolandyryjy geňeşine gatnaşmaga hukuk berýär.
Bolgar lewi 1881-nji ýylda, ýurduň Osman imperiýasynyň düzüminden çykanyndan soňra dolanyşyga girizilipdi. Bolgariýa 2007-nji ýyldan bäri ÝB-niň agzasydyr, 2025-nji ýylyň 1-nji ýanwaryndan bolsa Şengen zolagyna goşuldy. Ýewro geçmek baradaky kanun ýurduň parlamenti tarapyndan 2024-nji ýylyň awgustynda kabul edildi.
