Apple-yň baş direktory Tim Kuk Nike kompaniýasynyň takmynan 3 million dollarlyk paýnamasyny satyn aldy. Reuters agentliginiň habar bermegine görä, işewür kompaniýanyň çärýeklik hasabatynyň gowşak çykmagy sebäpli nyrhlar pese gaçandan soň, her biri 58,97 dollardan bolan 50 müň sany paýnamany satyn aldy.
Bu habaryň çäginde, 24-nji dekabrda Nýu-Ýork gazna biržasynda Nike-yň paýnamalary 5,1% ýokarlanyp, Aşgabat wagty bilen sagat 19:55-e çenli 60,28 dollara ýetdi.
Bellemeli zat, Tim Kuk 2005-nji ýyldan bäri sport harytlaryny öndüriji bu kompaniýanyň direktorlar geňeşiniň agzasydyr we onda baş garaşsyz direktor wezipesini eýeleýär. Ol mundan ozal hem Nike-yň 105 480 paýnamasyna eýelik edýärdi.
Nike kompaniýasynyň çärýeklik görkezijileriniň pes bolmagyna Hytaýdaky islegiň peselmegi we Converse brendiniň işiniň netijeleri täsir etdi. Şol sebäpli soňky üç söwda sessiýasynyň dowamynda kompaniýanyň paýnamalary öz bahasynyň 12,6%-ini ýitiripdi.
