Fransiýanyň deňiz arheologlary Bretan kenarýakalarynda dokuz metr çuňlukda biziň eramyzdan öňki 5000-nji ýyllarda gurlan daş diwary tapdylar diýip, BBC habar berýär.
Uzynlygy 120 metr, beýikligi bolsa takmynan 2 metr bolan bu desga Sen adasynyň golaýynda ýerleşýär.
Barlagçylaryň maglumatlaryna görä, bu desga adanyň kenarýaka liniýasynyň boýunda gurlupdyr. Ol suwuň galmagyndan goranmak üçin ýa-da balyk tutmak üçin niýetlenen bent hökmünde ulanylypdyr. Wagtyň geçmegi bilen deňiz derejesiniň ýokarlanmagy sebäpli, ada bu desga bilen bilelikde diýen ýaly dolulygyna suwa batypdyr.
Alymlar bu çäkleriň suwa batmagynyň breton rowaýatlarynyň döremegine esas bolan bolmagynyň mümkindigini aýdýarlar. Hususan-da, söhbet ýerli yrym-ynançlara görä tapylan desganyň gündogarynda ýerleşen rowaýaty Ker-Is şäheri barada gidýär. Rowaýata görä, IV–V asyrlarda ýaşan Kornuaý patyşasy Gradlon bu şäheri gyzy üçin gurdurypdyr we ony ägirt uly inženerçilik desgasy arkaly ummandan goramak isläpdir.
