Parižiň Şikaýat kazyýeti 2009-njy ýylda Atlantik ummanynyň üstünde AF447 gatnawynyň heläkçilige uçramagy bilen baglylykda Airbus awiaöndürijisini we Air France awiakompaniýasyny tötänden adam öldürmekde günäkär diýip ykrar etdi. Heläkçiligiň netijesinde 228 adam pida boldy.
Kazyýet Airbus we Air France kompaniýalaryny bu heläkçilik üçin «ýeke-täk jogapkärler» diýip kesgitledi. Iki kompaniýanyň hersine bu madda boýunça iň ýokary jerime — 225 müň ýewro jerime salyndy. Heläk bolanlaryň maşgalalarynyň käbiri bu jezany «ýönekeý bir göz üçin» diýip atlandyrdy.
Mundan ozal, 2023-nji ýylyň aprel aýynda Parižde kazyýetiň aşaky instansiýasy tarapyndan bu iki kompaniýa aklanypdy.
Air France awiakompaniýasynyň Airbus A330-203 kysymly uçary Rio-de-Žaneýrodan Pariže tarap gatnaw edýärdi we 2009-njy ýylyň iýun aýynda heläkçilige uçrady. Uçaryň bortunda 216 ýolagçy we 12 ekipaž agzasy bardy. Heläk bolanlaryň arasynda Fransiýanyň, Braziliýanyň, Germaniýanyň, ABŞ-nyň, Beýik Britaniýanyň we Irlandiýanyň raýatlary bar.
Uçaryň bölekleri uzak wagtlap dowam eden gözleg işlerinden soň, Atlantik ummanynyň düýbünden, takmynan, 10 müň inedördül kilometr meýdanly ýerden tapyldy. Uçaryň «gara gutusy» bolsa 2011-nji ýylda tapyldy.
2012-nji ýylda fransuz derňewçileri heläkçiligiň esasy sebäbi ekipaž agzalarynyň sazlaşykly hereket etmezligi, pes taýýarlygy we tizligi ölçeýän datçikleriň doňup, hatardan çykmagy bilen baglanyşykly diýen netijä geldi. Derňewler boýunça, uçarmanlar tizligiň nädogry görkezilmegi sebäpli ugurlaryny ýitiripdir. Şonuň üçin uçar tizligini peseldip başlanda, olar uçaryň burnuny aşak düşürmegiň deregine, ýalňyşlyk bilen ýokary galdyrypdyr. «BBC News» habar gullugynyň bellemegine görä, bu heläkçilikden soň uçarmanlary taýýarlamak maksatnamalary düýpgöter üýtgedildi we uçarlardaky tizligi ölçeýän datçikler çalşyryldy.
Air France we Airbus kompaniýalary bu aýyplamalary ret etdi we günäkär hasaplanan ýagdaýlarynda şikaýat arzasyny berjekdiklerini mälim etdi. Air France kompaniýasy bu gatnawy amala aşyran uçarmanlaryň tejribesine şübhelenmek üçin hiç hili esasyň ýokdugyny öňe sürdi.
