Fransiýanyň «LVMH» lýuks harytlar konglomeraty özüniň ilkinji Adam hukuklary baradaky Hartiýasyny hödürledi. Ol kompaniýanyň halkara ýörelgelerine we adam hukuklarynyň düýpli esaslaryna boýun egmek borçnamasyny berkidýär. Bu barada «WWD» neşiri ýazýar.
«Adam hukuklaryna hormat goýmak — diňe bir etiki zerurlyk däl, eýsem konglomeratyň işiniň durnuklylygynyň hem şertidir» diýlip, resminamada bellenilýär.
Resminama “Adam hukuklary baradaky Halkara bill” ýaly halkara konwensiýalaryna esaslanýar. Onuň düzgünleri diňe bir toparyň düzümine girýän kompaniýalara däl, eýsem LVMH-niň üpjün edijilerine we iş hyzmatdaşlaryna hem degişlidir.
Hartiýa zähmet şertleri, kemsitmeler, zorluk, medeni özleşdirme, daşky gurşawy goramak we ýaragly çaknyşyklar ýaly meseleleri öz içine alýar.
LVMH-de adam hukuklary boýunça wise-prezident wezipesine kompaniýa geçen aý goşulan Juli Wallat bellenildi. Ol «Dior», «Louis Vuitton», «Tiffany & Co.» we «Sephora» ýaly toparyň ähli brendlerinde täze strategiýany ornaşdyrmaga jogapkär bolar. Ozal Wallat «L'Oréal» kompaniýasynda şeýle wezipede işläpdir, şeýle hem «Total» kompaniýasynda adam hukuklary ugruna ýolbaşçylyk edipdir.
