Arheologlar Ierusalimde gadymy şäher diwarynyň iň doly we iň uzyn bölekleriniň birini tapdylar, ol Hasmoneý döwrüne (2100 ýyldan gowrak wagt mundan ozal) degişli diýip, Associated Press habar berýär.
Galanyň binýadynyň uzynlygy tas 50 metre, ini bolsa 5 metre golaý.
Bu ýer Kişle binasynyň köne ganatynyň, öňki harby bazanyň, häzirki wagtda bolsa Dawudyň Diňi muzeýine berlen ýeriň astynda ýerleşýärdi. Bu ýerde işler 1999-njy ýylda başlananam bolsa, diňe 2023-nji ýylda täzeden janlandyryldy.
Barlagçylar diwaryň ýokarky böleginiň wagtyň geçmegi bilen ýykylman, eýsem bilgeşleýin sökülip aýrylandygyny anykladylar. Ysraýylyň Gadymy ýadygärlikler müdirliginiň işgäri doktor Amit Reem diwaryň belli bir meýilnama laýyklykda bilgeşleýin sökülip aýrylandygyny aýtdy.
Alymyň sözlerine görä, tapylan bölek gadymy taryhçy Iosif Flawiý tarapyndan ýewreý patyşasy Ioan Girkan I bilen Antioh VII-niň arasyndaky şertnama barada beýan edilen wakanyň arheologik subutnamasy bolup biler, oňa laýyklykda şäher berkitmeleri ýok edilmelidi.
Ýewreý uniwersitetiniň professory Orit Peleg-Barkat alternatiw wersiýany teklip etdi. Ol diwaryň sökülmegini biziň eýýamymyzdan öňki I asyrda patyşa Irodyň köşgüniň gurluşygynda binýad üçin ulanylmagy bilen baglanyşdyrýar.
Tapylan bölek Dawudyň Diňi muzeýinde açyljak täze serginiň bir bölegine öwrüler.
