Hytaýyň Çanşa şäherindäki ýol polisiýasy ulaglary barlamak işini çaltlaşdyrmak maksady bilen, emeli aň (EA) bilen üpjün edilen akylly äýnekleri ulanmaga başlady. Täze enjamlaryň kömegi bilen ofiserler ulaga diňe bir gezek göz aýlamak arkaly, birnäçe sekuntda ol barada doly maglumat alyp bilýärler.
Şäheriň jemgyýetçilik howpsuzlygy bölüminiň maglumatyna görä, bu enjamlar inspektorlara gündelik işlerinde ulanmak üçin berildi. Äýnekler 12 megapikselli giň burçly kamera, suraty durnuklaşdyryjy algoritm we takyklyk derejesi 99%-den ýokary bolan awtonom döwlet belgisini tanamak ulgamy bilen enjamlaşdyrylandyr. Ulgamyň jogap beriş wagty bir sekuntdan hem azdyr. Äýnekleriň batareýasy bolsa sekiz sagatlap yzygiderli işlemäge mümkinçilik berýär.
Awtoulagyň belgisini tanan badyna, emeli aň polisiýanyň maglumatlar bazasyna şolbada girip, inspektoryň göz öňünde ulagyň hasaba alnyşy, tehniki gözegçiligi, jerimeleri we beýleki maglumatlary görkezýär.
Bu tehnologiýanyň ornaşdyrylmagy bir ulagy barlamak üçin gerek bolan wagty 30 sekuntdan 1-2 sekunda çenli gysgaltdy, bu bolsa ýol hereketiniň netijeliligini 80% ýokarlandyrdy. Emeli aňly äýnekler polisiýa işgärleriniň iş ýüküni azaldýar, işiň takyklygyny ýokarlandyrýar we sürüjiler bilen ýüze çykyp biljek dawa-jenjelleriň öňüni almaga kömek edýär.
