«Ýyldyz söweşleri» älemini mahabatlandyrmak üçin döredilen ilkinji surat auksionda rekord 3,875 mln dollara satyldy. Bu barada Associated Press habar berýär.
Art-poster franşiza bilen baglanyşykly ähli predmetler üçin täze rekord goýdy hem-de kinoafişa üçin döredilen iň gymmat hakyky eser boldy.
Heritage Auctions auksiony Dallasda geçirildi. Auksion öýüniň saýty arkaly teklip beren söwdanyň ýeňijisi adynyň aýdylmazlygyny isledi.
Surat hudožnik we kinoposter dizaýneri Tom Ýung tarapyndan akril reňklerini we aerografy ulanmak bilen çekildi. Ilkinji gezek surat 1977-nji ýylyň 13-nji maýynda, Jorj Lukasyň ilkinji filminiň premýerasyndan öň gazet mahabatynda neşir edildi. Soňra surat bilbordlarda, žurnal mahabatynda we teatr programmalarynda ulanyldy. Suratda şöhle gylyjy bilen Lýuk Skaýuoker, şa gyzy Leýa, Dart Weýder, X-wing ýok edijisi, şeýle-de R2-D2 we C-3PO robotlary şekillendirildi.
Suratyň hakyky nusgasy «Ýyldyz söweşleriniň» prodýuseri Geri Kursda saklandy, soňra ol ony öz gyzyna berdi. Kursuň maşgalasy suraty Dallasda Heritage Auctions-yň ştab-kwartirasynda satuwa çykardy. Söwda 1 mln dollardan başlady. Ozal «Ýyldyz söweşleri» bilen baglanyşykly iň gymmat predmet 3,6 mln dollara satylan Dart Weýderiň şöhle gylyjydy.
