Türkiýe Somaliniň çäginde kosmodrom gurmak işine girişdi. Bu desga ýurda öz raketa göterijilerini ulanmak mümkinçiligini berer diýip, Baykar awiagurluşyk kompaniýasynyň müdirler geňeşiniň başlygy Selçuk Baýraktar Stambulda geçirilen Take off tehnologiýa forumynda aýtdy.
«Adatça, kosmodrom raketa göterijilerini ulanmak üçin ummanyň golaýynda ýerleşmeli. Somalide bolsa Türkiýäniň şeýle ýeri bar, onuň meýdany 30 x 30 kilometr. Dünýäde şeýle meýdançalar bary-ýogy 12 sany. Döwlet eýýäm Somalide kosmodromyň gurluşygyna girişdi» - diýip, Türkiye Today Baýraktaryň sözlerini getirýär.
Şeýle-de, Selçuk Baýraktar Baykar kompaniýasynyň GPS-e meňzeş türk nawigasiýa ulgamyny döretmek meýilnamalary barada aýtdy. Ol XV asyryň döwlet işgäri we Tamerlanyň agtygy Ulugbegiň hormatyna Uluğ Bey adyny alar. Ulgamy döretmegiň üstünde 130 inžener işleýär.
Türkiýe 2018-nji ýylda Türk kosmos agentligi (TUA) döredileni bäri öz kosmos programmasyny işjeň ösdürýär. Soňky ýyllarda ýurt birnäçe telekommunikasiýa we gözegçilik hemralaryny, şol sanda Türksat seriýasyny we Göktürk gözleg enjamlaryny işe girizdi. 2023-nji ýylda doly derejede Türkiýe tarapyndan öndürilen İMECE hemrasy orbita çykaryldy.
