M.W.Lomonosow adyndaky Moskwa döwlet uniwersitetiniň (MDU) Topragy öwreniş bölüminiň hünärmenleri gögerçinleriň dersinde adam saglygy üçin howply bolan askomiset görnüşli gabartmalary tapdylar. Uniwersitetiň metbugat gullugynyň habar bermegine görä, bu mikroorganizmler esasan hem çagalarda we immun ulgamy gowşak adamlarda bu görnüşli ýokançlyklaryň döremegine sebäp bolup biler.
Barlagçylar 200-e golaý guşdan alnan ders nusgalaryny seljerdiler. Hususan-da, aşakdaky guşlardan nusgalar alyndy:
- 48 sany gögümtil-çal gögerçin;
- 47 sany ýewropa garasary;
- 38 sany ak dag geçiguşy;
- 32 sany uly geçiguş;
- 30 sany öý serçesi.
Netijede, gabartmanyň 9 görnüşine degişli bolan 638 sany ştamm tapawutlandyryldy.
Uniwersitetiň habar bermegine görä, gögerçiniň täze derslerinde Candida spp gabartmasynyň alty görnüşinden bäşisi bar. Bütindünýä Saglygy Goraýyş Guramasy (BSGG) bu gabartmalary 2022-nji ýylda ilkinji gezek aýratyn howply patogen görnüşleriniň sanawyna goşdy.
Gögerçin dersinde "ähtimal patogen gabartmalarynyň iň köp dürlüsi" bardyr. Howply mikroorganizmler az mukdarda bolsa-da, hatda gury dersde-de saklanýar.
"Patogenler aýakgabyň aşagyna ýapyşyp, ýaşaýyş jaýlaryna, çagalar baglaryna we hassahanalara getirilip bilner" – diýip, Moskwa döwlet uniwersitetinde bellediler.
