Braziliýa denge gyzzyrmasyna garşy dünýäde ilkinji bir komponentli waksinanyň synaglaryny üstünlikli tamamlap, ony ibermek üçin taýýarlady. Bu derman gaýtadan goýberilmegi talap etmeýär we iň ejiz ýurtlara eltip bermek üçin niýetlenendir diýip, Rio-de-Žaneýro Federal uniwersitetiniň (UFRJ) rektory Robertu Medronýua salgylanýan TASS habar berýär.
Waksina San-Pauludaky Butantan instituty atly lukmançylyk barlag merkeziniň hünärmenleri tarapyndan işlenip düzüldi. Eýýäm 1 milliondan gowrak doza öndürildi.
"Biz bir komponentli waksina döretdik. Dünýäde häzirki wagta çenli beýle işläp taýýarlama ýok. Indi adamlar ikinji ýa-da üçünji dozalary almak üçin lukmançylyk merkezlerine gaýdyp barmaly bolmazlar" – diýip, Medronýu belledi.
Rektoryň sözlerine görä, Braziliýada entek millionlarça doza öndürmek mümkinçiligi ýok, şonuň üçin bu işde kömek berjek we eltip bermekligi gurajak Hytaý kompaniýasy bilen hyzmatdaşlyk ýola goýuldy.
Denge keseli – XIX asyryň ahyrynda Braziliýada ýüze çykan howply tropiki keseldir. Waksina döredilmezden ozal epidemiýa garşy göreşmegiň ýeke-täk usuly keseli ýaýradýan çybynlaryň ýaşaýan ýerlerini ýok etmekdi. 2024-nji ýylda Braziliýa keseliň güýçli ýaýramagy bilen bagly taryhynda ilkinji gezek denge waksinasiýa kampaniýasyna başlady.
