1-3-nji dekabr aralygynda Aşgabatda Pandemiýalaryň öňüni almak, oňa taýýarlyk, jogap bermek we soňky dikeldiş boýunça Türkmenistanyň Hereketleriň Milli meýilnamasynyň (HMM) taslamasyny jemlemäge gönükdirilen PanPRET atly okuw maslahatlary geçirildi.
Çäre Bütindünýä Saglygy Goraýyş Guramasynyň (BSGG) Ýewropa sebit edarasynyň goldaw bermeginde BMG-niň binasynda guraldy.
Okuw maslahatyna saglygy goraýyş, weterinariýa pudaklarynyň we degişli pudaklaýyn gulluklaryň wekilleri ýygnandy. Okuw maslahatyny BSGG-niň pandemiýalara taýýarlyk boýunça ýöriteleşen halkara bilermenleri geçirdi.
Çäräniň maksady milli meýilnamalaşdyryş ulgamyny güýçlendirmek, COVID-19-yň sapaklaryny we halkara maslahatlaryny göz öňünde tutup, HMM-niň taslamasyny jikme-jik seljermek we täzelemek boldy. Gatnaşyjylar meýilnamanyň esasy düzüm bölekleriniň, şol sanda pudagara utgaşdyrmanyň, köpçülikleýin saglygy goraýyş çärelerini dolandyrmagyň we töwekgelçilikleri habar bermegiň taýýarlygyny synagdan geçirdiler.
Okuw maslahatlarynyň dowamynda epidemiologik gözegçilik, laboratoriýa diagnostikasy, lukmançylyk serişdelerini eltip bermegiň logistika zynjyrlary we ilaty habardar etmegiň strategiýasy ýaly meseleleri öz içine alýan pandemiýanyň ösüş senariýalaryna seredildi. “Bitewi saglyk” konsepsiýasynyň çäginde haýwanlardaky we serhetüsti kesellere bolan howplara dessin jogap bermek mehanizmlerini güýçlendirmegiň zerurlygyna aýratyn üns berildi.
Okuw maslahatlarynyň netijeleri boýunça HMM-niň täzelenen görnüşi, milli biohowpsuzlyk ulgamynyň aýry-aýry düzüm böleklerini güýçlendirmek boýunça maslahatlar, şeýle hem geljekde halkara hyzmatdaşlar bilen tälim almak we hyzmatdaşlyk etmek boýunça teklipler bilen hasabat taýýarlanylar.
