Türkmenistanyň we Russiýa Federasiýasynyň Gahrymany, Kosmonawtlary taýýarlamak merkeziniň başlygy Oleg Kononenko RBK neşirine beren interwýusynda Ýere dolanmazdan öň öz edýän aýratyn işleriniň we şahsy däbiniň jikme-jiklikleri barada gürrüň berdi.
Ýeriň daşynda (1111 gün) geçiren günleriniň sany boýunça dünýä rekordyny goýan kosmonawt orbitada uzak wagt bolanyndan soň, öýüne gaýdyp gelmäge uýgunlaşmagy ýeňilleşdirmek üçin her gezek şol bir kitaby okaýandygyny aýtdy.
Ol Ýerden uzakda durmuşda ileri tutulýan zatlaryň üýtgeýändigini belledi. Onuň sözlerine görä, bilelikde işleýän ekipažynyň agzalary üçin awtoulagyň markasy ýa-da kwartira ýaly, ýerdäki zatlar düýbünden möhüm däl.
"Ol ýerde jemgyýetde özüňi nähili alyp barşyň, şahsyýetiň gyzyklanmasy, aňyň, bilimiň we elleriňi işledip bilmek ukybyň esasy orunda durýar. Bular Ýerdäki durmuşda esasy häsiýetler hem däl" - diýip, Kononenko aýtdy.
"Men hemişe Ýere dolanmazdan öň Bulgakowyň "It ýüregi" eserini gaýtadan okaýaryn. Bu meniň hakyky durmuşa dolanmak üçin däbim" diýip, ol sözüniň üstüne goşdy.
Mundan başga-da, kosmonawt Ýere gaýdyp gelýärkä maşgalasy we çagalary bilen duşuşmaga hemişe sabyrsyzlyk bilen garaşýandygyny, olaryň özüne buýsanjakdygyna umyt baglaýandygyny aýtdy.
