Russiýanyň soňky imperatory Nikolaý II-niň kolleksiýasyndan Faberženiň “Gyş ýumurtgasy” Londonda geçirilen auksionda 19,5 mln funt sterlinge (25,7 mln dollara deň) satyldy. Bu häzire çenli şeýle görnüşli önüm üçin tölenen iň ýokary baha boldy. Söwdanyň netijesi barada Christie’s auksion öýüne wekilçilik edýän auksionçy Ýuý Ge Wan habar berdi.
Christie’s komissiýany hasaba alyp, alyjynyň, umuman, 22,9 mln funt sterling (30,2 mln dollar) tölejekdigini belledi. Söwda 17 mln funt sterlingden (22,4 mln dollar) başlady.
“Gyş ýumurtgasy” Nikolaý II-niň 1913-nji ýylda öz ejesine, imperator aýaly Mariýa Fýodorowna pasha sowgady bolupdy. Onuň dizaýnyny ýaş zergär, Karla Faberženiň ussalarynyň biriniň gyzy Alma Pil döretdi.
Ýumurtganyň korpusy dag hrustalyndan ýasaldy we aýaz kristallaryny ýatladýan nagyş bilen bezeldi. Şeýle-de, onuň bezeginde 4 müňden gowrak “bägül” gyraňly göwherler ulanyldy. Ýumurtganyň içinde ýazyň gelendigini alamatlandyrýan kwarsdan we jadeitden ak gülleriň çemeni bilen sebet ýerleşdirildi.
Göwherleri we almazlary berkitmek işi Albert Holmstremiň ussahanasynda alnyp baryldy. Nagyş salmak işi Pýotr Kremlýowyň ýolbaşçylygynda Faberženiň ussahanasynda ýerine ýetirildi.
