26-njy noýabrda çykan Disney studiýasynyň “Haýwanlar şäheri 2” animasion filmi dünýä prokatynda başlangyç kassa ýygymy boýunça rekord goýdy. Multfilm 556 mln dollar ýygnady. ABC News-iň maglumatlaryna görä, bu taryhda ähli multfilmleriň arasynda iň gowy we islendik žanrdaky filmleriň arasynda dördünji netije boldy.
Demirgazyk Amerikada ilkinji uikendde multfilm 96 mln dollar, bäş günlük Minnetdarlyk güni döwründe bolsa 156 mln dollar gazandy. Animasion filmiň çarşenbe güni çykany bäri dünýädäki umumy kassa ýygymy 556 mln dollara ýetdi.
Deadline neşiri prokatyň başynda ondan ýokary netijäni diňe 1,2 mlrd dollar bilen “Ar alyjylar: Final”, 640 mln dollar bilen “Ar alyjylar: Bakylyk urşy” we 600,5 mln dollar bilen “Möý adam: Öýe ýol ýok” filmleriniň görkezendigini belleýär.
Hytaýda multfilm prokatyň ilkinji gününde 100 mln dollar ýygnap, Golliwud filmleri üçin rekord goýdy. Ozal bu görkeziji boýunça bir günde 97,5 mln dollar ýygnan “Ar alyjylar: Final” öňde barýardy.
Şeýle-de, prokatda “Zalym. Bölüm 2” filmi hem saklandy. Ol ikinji uikendde Demirgazyk Amerikada 62,8 mln dollar ýygnap, umumy kassa ýygymyny 393 mln dollara ýetirdi.
