Apple şu ýyl 2011-nji ýyldan bäri ilkinji gezek ýyllyk smartfon üpjünçiligi boýunça Samsung-dan öňe geçip biler. Bu barada Counterpoint Research kompaniýasynyň çaklamasyna salgylanyp, CNBC habar berýär.
Analitikler şeýle ösüşi iPhone 17 hatarynyň üstünlikli bolmagy we pandemiýadan soň smartfonlaryň işjeň ýagdaýda täzelenmegi bilen baglanyşdyrýar.
Hasaplamalara görä, 2025-nji ýylda Apple bazara 243 mln töweregi iPhone, Samsung bolsa, takmynan, 235 mln smartfon iberer. Apple-iň dünýä bazaryndaky paýy 19,4%, Samsung kompaniýasynyňky 18,7% bolar. Üpjünçilik satuw bilen deň bolmasa-da, olar kompaniýanyň garaşylýan islege görä önümçilik meýilnamalaryny görkezýär.
Üstünligiň esasy sebäbi sentýabrda iPhone 17 smartfonlarynyň çykmagy boldy, ol kompaniýanyň baýramçylyk döwründe güýçli satuwyny üpjün etdi. ABŞ-da täze hatara bolan isleg ilkinji dört hepdede geçen ýylky hatardan 12% ýokary, Hytaýda bolsa 18% ýokary boldy. Analitikler pandemiýa döwründe smartfon satyn alan köp ulanyjylaryň häzir täze modellere geçýändigini belleýär, bu hem satuwy ep-esli ýokarlandyrýar.
Hasabat maglumatlaryna görä, Samsung elýeterli we orta gurluşlaryň segmentinde hytaý brendleri tarapyndan bäsdeşligiň güýçlenmegi bilen ýüzbe-ýüz bolýar, bu hem onuň öňdebaryjy bolmagyny kynlaşdyrýar.
Counterpoint Apple-iň azyndan 2029-njy ýyla çenli birinji orny saklajakdygyny çaklaýar. Muňa ulanylan iPhone smartfonlarynyň bazary-da ýardam edýär: 2023-nji ýyldan 2025-nji ýylyň ikinji çärýegi aralygynda şeýle smartfonlardan 358 mln sanysy satyldy. Şol sebäpli smartfon eýeleriniň köpüsiniň täze modellere geçmegine garaşylýar.
Şeýle-de, analitikler kompaniýanyň hyzmat we funksiýa ekoulgamyny giňeltmegiň hasabyna öz ornuny berkidýändigini belleýär. Kompaniýanyň 2026-njy ýyl üçin meýilnamalarynda arzan iPhone 17e-ni we ilkinji eplenýän smartfony çykarmak bar. 2027-nji ýyla meýilleşdirilen uly dizaýn täzelenmesi we Siri-niň kämilleşdirilen wersiýasy hem onuň ornuny has berkider.
