1939-njy ýylda çykan “Supermen” komiksiniň ilkinji sanynyň asyl nusgasy auksionda 9,12 mln dollara satyldy. NBC News-iň habar bermegine görä, bu komiks bazary üçin hakyky rekord boldy.
Uzak wagtlap bu nusga ýitirilen diýlip hasaplanypdy: ol köp ýyllap Demirgazyk Kaliforniýadaky bir öýüň üçeginde gutuda saklanypdyr. Ony üç dogan ejesi aradan çykandan soň goşlary tertipleşdirip ýörkä tapdy. Ene-atasy olara birwagtlar 1930-njy ýyllaryň seýrek komikslerini saklandygyny aýdypdy, ýöne hiç kim olaryň nirededigini bilmeýärdi. Bu gürrüňler wagtyň geçmegi bilen maşgala rowaýatyna öwrüldi we garaşylmadyk ýagdaýda hakykat bolup çykdy.
Bellenilişi ýaly, nusga örän gowy ýagdaýda saklanypdyr. Komikslere we kolleksiýa kartoçkalaryna baha berýän kompaniýa oňa mümkin bolan 10 baldan 9 bal berdi.
Heritage Auctions auksion öýi “Supermen №1-i” häzire çenli satylan iň gowy nusga diýip atlandyrdy we täze satuwyň öňki 6 mln dollar rekorddan geçendigini habar berdi.
Supermen personažy Ýewropadan ýewreý immigrantlaryň ogullary, ýazyjy Jerri Sigel we suratkeş Jo Şuster tarapyndan döredildi. Olaryň gahrymany eýýäm 90 ýyl bäri dünýä medeniýetiniň bir bölegi bolup galýar.
Soňra Sigel we Şuster Supermen üçin hukugy bary-ýogy 130 dollara satdy. Ahyrynda olar we olaryň mirasgärleri ençeme gezek kazyýetiň üsti bilen hukugy yzyna almaga çalyşdy, ýöne şowsuz boldy. Bellenilişi ýaly, 1978-nji ýylda, haçan-da Supermen barada ilkinji film çykanda, Şuster diýseň kyn şertlerde ýaşaýardy we kurýer bolup işleýärdi.
2012-nji ýylda gahryman üçin hukugyň satylandygy baradaky çek auksiona çykaryldy we 160 müň dollara satyldy.
