«Türkmen-Fransuz gatnaşyklary: häzirki zamanyň kynçylyklary we geljegi» atly maslahatyň çäklerinde, Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa Parižde Fransiýanyň öňdebaryjy ýokary okuw mekdepleri, şol sanda Pariž II Panteon-Assas, Sorbonna we Syýasy barlaglar instituty (Sciences Po) bilen akademiki hyzmatdaşlygy ösdürmek boýunça başlangyçlary hödürledi.
Türkmen diplomatik ýokary okuw mekdebiniň rektory halkara hukugy, ýaşyl energiýa, suw serişdelerini dolandyrmak we diplomatik barlaglar boýunça bilelikdäki magistr we doktorlyk (PhD) maksatnamalaryny işläp düzmegi teklip etdi. Ýusupowa Türkmenistan üçin Bitaraplygyň diňe bir daşary syýasat doktrinasy bolman, eýsem, milli pelsepäniň esasyny düzýän we innowasiýalar hem-de ählumumy dialog üçin köprüleri döredýän intellektual konsepsiýadygyny nygtady.
Rektor öz çykyşynda durnukly ösüş ulgamyndaky bilelikdäki ylmy taslamalara aýratyn üns berdi: metan zyňyndylaryna gözegçilik, wodorod tehnologiýalaryny goşmak bilen gaýtadan dikeldilýän energiýa çeşmelerini ösdürmek, ekologiýa taýdan durnukly şäher gurluşy we suwdan rejeli ulanmak.
Gülşat Ýusupowa amaly teklip hökmünde goşa diplom maksatnamalaryny, diplomatiýa we halkara gatnaşyklary boýunça fransuz-türkmen tomusky mekdeplerini guramagy, şeýle hem talyplar we mugallymlar üçin okuw-hünär tejribelerini giňeltmegi belledi.
Fransiýa bilen akademiki hyzmatdaşlygyň başlangyjy 1994-nji ýylda Prezident Fransua Mitteranyň Türkmenistana ilkinji sapary mahalynda, dilleri okatmak boýunça ylalaşyga gol çekilende goýuldy.
