Awstriýaly suratkeş Gustaw Klimtiň “Elizabet Ledereriň portreti” suraty Nýu-Ýorkdaky Sotheby’s auksionynda 236,4 mln dollara satyldy. Bu barada auksion öýi X sosial ulgamynda habar berdi.
“Indi ol häzire çenli auksionda satylan iň gymmat häzirkizaman sungat eseri hasaplanýar” – diýlip, habarda aýdylýar.
Alyjynyň ady mälim edilmeýär.
Klimt bu portretiň üstünde 1914-nji ýylda işläp başlady we ony 1916-njy ýylda, ölmezinden iki ýyl öň tamamlady.
Elizabet Lederer suratkeşiň esasy howandarlarynyň hataryna giren belli kolleksionerler Awgust bilen Serena Ledereriň gyzydy. Awstriýanyň nasistler tarapyndan basylyp alnan döwri ol özüni Klimtiň gyzy hökmünde görkezip, aslynyň ýewreýdigini gizledi.
Portret nasistler tarapyndan ogurlandy, ýöne 1948-nji ýylda ol Ledereriň maşgalasyna gaýtarylyp berildi. 1983-nji ýylda surat art-diler Serže Sabarskä satyldy, iki ýyldan soň ony Estée Lauder brendiniň mirasdüşeri Leonard Lauder satyn aldy. Ol 2025-nji ýylyň iýunynda aradan çykýança onuň eýesi bolup galdy.
The Wall Street Journal neşiriniň habar berşi ýaly, surat üçin azyndan alty adam bäsleşdi. Olaryň biri baha 171 mln dollara ýetenden soň söwda goşuldy. Sungat eseri 150 mln dollardan gymmat alynmaz diýlip pikir edilipdi.
Klimtiň öňki iň gymmat suraty “Ýelpewaçly hanym” 2023-nji ýylda 108,8 mln dollara satyldy.
Iň gymmat satylan surat ady Christie’s auksion öýüne degişlidir. Bu ýerde 2017-nji ýylda Leonardo da Winçiniň “Dünýäniň halasgäri” suraty 450 mln dollara satyldy.
