Netflix "Çaga bilen uly adamyň garşylygy" (Man vs Baby) mini-serialyň ilkinji treýlerini çykardy. Bu "Ary bilen adamyň garşylygy" komediýasynyň dowamydyr.
Ilkinji görkezilişi 11-nji dekabrda meýilleşdirilýär.
Baş keşbi ýene Rouen Atkinson ýerine ýetirdi. Onuň gahrymany - Roždestwo baýramynyň öňüsyrasynda Londonyň gymmat bahaly penthausyna göz-gulak bolmak wezipesi teklip edilýän mekdep garawuly Trewor Bingli. Emma meýilnama bulaşýar: okuwyň soňky güni mekdep sahnasynda Isanyň bäbekligini oýnan çaganyň ene-atasy ony mekdepden alyp gitmegi ýatdan çykarýarlar. Bingli garaşylmadyk ýagdaýa düşüp, çaga enekelik etmäge galýar, ýagdaý garaşylandan çylşyrymly bolup çykýar.
Atkinson diňe bir filmde baş keşbi janlandyrman, eýsem Uilýam Dewis (“Aždarhany nädip eldekileşdirmeli” (“Как приручить дракона”)) bilen bilelikde filmiň edebi esasyny hem ýazypdyr. Taslama “Ary bilen adamyň garşylygy” filmini surata düşüren Dewid Kerr režissýorlyk etdi.
Serialda dört epizod bolar diýlip garaşylýar.
Klodi Blekli ýene Treworyň öňki aýaly Jessiniň keşbini ýerine ýetirer. Şeýle hem, filmde Stiw Ej, Sunetra Sarker, Sunil Patel, Sýuzanna Filding we Eşli Jensen dagy oýnar.
