Aziýanyň ösüş bankynyň prezidenti Masato Kandanyň ýurdumyza saparynyň çäklerinde duşuşyklar geçirildi. Duşuşyklaryň netijeleri boýunça Aşgabat şäherinde lukmançylyk orta okuw mekdebiniň gurluşygyny maliýeleşdirmek üçin Türkmenistan bilen Aziýanyň ösüş bankynyň arasynda Ylalaşyga hem-de Türkmenistanyň Saglygy goraýyş we derman senagaty ministrligi bilen Aziýanyň ösüş bankynyň arasynda tehniki kömek babatda hyzmatdaşlyk hakynda resminama gol çekildi. Bu barada TDH habar berýär.
Taslamanyň esasy, Aşgabat şepagat uýalary mekdebiniň täze, howa şertlerine durnukly binasynyň gurulmagydyr. Bu toplum döwrebap otaglar we barlaghanalar, şeýle hem ýaşaýyş jaýlary, eneler üçin dynç alyş otagy we hatda sagdyn iýmitlenmek ýörelgelerini öwretmek üçin bag bilen üpjün ediler.
Mundan başga-da, maliýeleşdirmäniň çäginde döwrebap okuw we lukmançylyk serişdeleri satyn alnar, şeýle hem okuw usullary we maksatnamalary halkara ölçeglere laýyklykda täzelener.
Taslama mugallymlaryň we hünärmenleriň hünär derejesini ýokarlandyrmaga, şeýle hem halkara hyzmatdaşlygy we lukmançylyk pudagynda öňdebaryjy tejribeleri alyşmagy ösdürmäge gönükdirilendir diýip, Türkmenistan habarlar portaly habar berýär.
