Elektromobil öndürýän Rivian amerikan kompaniýasy öz baş direktory Robert Skarinži sylaglamagyň täze ulgamyny tassyklady. Maksatnama on ýyla niýetlenýär we ähli şertler ýerine ýetirilen ýagdaýynda oňa, takmynan, 4,6 mlrd dollar getirip biler.
Töleg möçberi girdejiniň ösüşine, pul akymyna we kompaniýanyň paýnamalarynyň bahasynyň häzirki 15,22 dollardan 140 dollara çenli ýokarlanmagyna bagly bolar.
Reuters-iň habar berşi ýaly, şeýle etmek bilen Rivian-yň müdirler geňeşi kompaniýanyň esaslandyryjysyny saklamak we onuň tagallalaryny girdejililigi ýokarlandyrmaga gönükdirmek isleýär. Şol bir wagtyň özünde, Skarinžiň zähmet haky iki esse – 2 mln dollara çenli artdyryldy. Täze meýilnama ozal mümkin däl diýlip hasaplanan öňki meýilnamany çalyşdy.
Rivian özüniň R1S we R1T elektromobilleri bilen bellidir. Kompaniýa 2026-njy ýylda Tesla Model Y-nyň bäsdeşi boljak has elýeterli R2 krossowerini çykarmaga taýýarlanýar. Ýakynda awtoöndüriji çykdajylary azaltmak we elektrotransport bazarynda kompaniýanyň ornuny berkitmek maksady bilen işgärleriň, takmynan, 4,5%-ini işden çykardy.
Mundan öň Tesla-nyň paýdarlary Ilon Mask üçin 1 trln dollar möçberde töleg bukjasyny tassyklapdy. Ol on ýylyň içinde robotaksi ugruny ösdürmek we Tesla-nyň bazar bahasyny 1 trln dollardan azyndan 8,5 trln dollara ýetirmek boýunça maksatlary durmuşa geçiren ýagdaýynda bu mukdary alyp biler.
