Meta kompaniýasy WhatsApp-yň ýolbaşçy düzüminde üýtgeşmeleriň bolandygyny yglan etdi. Soňky ýedi ýylyň dowamynda messenjere ýolbaşçylyk eden Will Ketkart kompaniýanyň içinde başga bir wezipä geçýär. Täze ýolbaşçy bolsa hindi finteh-startapy Cred-iň esaslandyryjysy Kunal Şah bolar.
Meta-nyň ýolbaşçysy Mark Sukerbergiň aýtmagyna görä, Ketkart mundan beýläk täze önümleri döretmek bilen meşgullanar. Will Ketkart hem muny öz çykyşynda: «WhatsApp şu wagt öz taryhyndaky iň güýçli döwrüni başdan geçirýär. Meniň pikirimçe, bu bir gyra süýşmek üçin iň amatly pursatdyr» diýmek bilen, aýratyn tekrarlady.
Meta bu messenjeri 2014-nji ýylda 19 milliard dollara satyn alypdy. Şu günki gün bu hyzmat dünýäniň iň meşhur messenjerleriniň biri bolup, aýda 3 milliarddan gowrak işjeň ulanyjysy bar.
Maý aýynda kompaniýa WhatsApp, Facebook we Instagram üçin tölegli ýazylmalaryň ýola goýlandygyny, şeýle-de emeli aň (EA) hyzmatlary üçin täze nyrhnamalaryň synag edilýändigini habar beripdi. Bu ädimler girdeji çeşmelerini köpeltmäge we emeli aňy ösdürmek üçin sarp edilýän çykdajylary bölekleýin dolmaga gönükdirilendir.
Kunal Şah Cred platformasyny 2018-nji ýylda esaslandyrypdy. Bu hyzmat ulanyjylary karz kartlary boýunça tölegleri wagtynda amala aşyrandyklary üçin höweslendirýär.
Sukerbergiň belleýşi ýaly, Şahyň saýlanylmagyna onuň işe telekeçilerçe çemeleşmesi we telekeçiligi ösdürmekdäki dünýewi garaýşy sebäp boldy.
Bu täzeligigiň çäginde, Cred 4,5 milliard dollar bahasy bilen Meta-dan 900 million dollarlyk maýa goýum hem aldy.
