8-nji noýabrda Türkmenistanda Prezident Serdar Berdimuhamedowyň hem-de Halk Maslahatynyň Başlygy Gurbanguly Berdimuhamedowyň gatnaşmagynda ählihalk bag ekmek dabarasynyň güýzki möwsümine badalga berildi.
Prezident Serdar Berdimuhamedow Aşgabadyň günortasynda 12 ýyllyk türkmen arçasyny oturdyp, güýzki ählihalk bag ekmek dabarasyna badalga berdi. Çäräniň dowamynda döwlet Baştutany käbir wise-premýerleriň alyp barýan işleri bilen gyzyklandy.
Oba hojalyk toplumyna gözegçilik edýän wise-premýer T.Atahallyýew tutuş ýurdumyz boýunça geçirilýän ählihalk bag ekmek dabarasynyň barşy hem-de Milli tokaý maksatnamasyny durmuşa geçirmegiň çäklerinde ýerine ýetirilýän işler barada hasabat berdi. Aşgabada gözegçilik edýän wise-premýer B.Annamämmedow baş şäherimizi abadanlaşdyrmak we bagy-bossanlyga öwürmek boýunça alnyp barylýan işler barada hasabat berdi.
Türkmen halkynyň Milli Lideri Gurbanguly Berdimuhamedow Arkadag şäherinde geçirilen köpçülikleýin bag ekmek dabarasyna gatnaşdy. Dabaraly çäräniň dowamynda aýdymçylar bilen “Galkynyş” milli at üstündäki oýunlar toparynyň gatnaşmagynda edebi-sazly kompozisiýa ýaýbaňlandyryldy.
Soňra Gurbanguly Berdimuhamedow sungat ussatlary bilen söhbetdeş bolup, olaryň milli sungatymyza, halkymyzyň döreden ajaýyplyklaryna, bedewlerimize, alabaýlarymyza, halylarymyza belent-belent daglarymyza we gözel tebigatymyza buýsanyp, olary öz sungatlary bilen wasp etmekleri barada öz maslahatlaryny berdi.
Gahryman Arkadagymyz aýdym-sazly çykyşlar bilen sazlaşykly hereket edýän milli eşikli oglanlara çuňňur sylag-hormatyň nyşany hökmünde, “Türkmenistan” ýazgyly we bedewleriň şekilleri ýerleşdirilen hem-de sünnälenip taýýarlanan boýun lybasyny gowşurdy.
Türkmen halkynyň Milli Lideri ählihalk bag ekmek dabarasynyň dowam edýän pursatlarynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça ýerine ýetiriji direktory--wise-prezidenti O.Atabaýewa bilen gürrüňdeş bolup, ýurdumyzda kömege mätäç çagalara mundan beýläk-de yzygiderli goldaw bermek babatda öwüt-nesihatlaryny berdi.
