Türkmenistanyň Yslamabatdaky ilçisi Atajan Möwlamow Pakistanyň Milli hünär we tehniki taýýarlyk komissiýasynyň (NAVTTC) başlygy Gulmina Bilal Ahmad bilen duşuşdy.
Duşuşykda NAVTTC-niň alyp barýan işleri boýunça gysgaça maglumat berildi. Pakistaniň wekili bu guramanyň ilatyň iş bilen üpjünçiligini ýokarlandyrmakda, täze iş orunlaryny döretmekde we bilim edaralaryny goldamakda möhüm rol oýnaýandygyny belledi.
Taraplar hünär biliminde öňdebaryjy tejribeleri alyşmak, işgär taýýarlamagyň bilelikdäki maksatnamalaryny döretmek we sebitiň tehniki hem-de hünär taýýarlygyny kämilleşdirmek babatda hyzmatdaşlygyň mümkinçiliklerini ara alyp maslahatlaşdylar.
Duşuşygyň netijesi boýunça taraplar özara peýdaly bilelikdäki taslamalary we maksatnamalary durmuşa geçirmek mümkinçiliklerini öwrenmek, şeýle hem peýdaly dialogy dowam etmek barada ylalaşdylar.
