Samarkantda geçirilen ÝUNESKO-nyň 43-nji Baş maslahatynyň çäginde her ýylyň 15-nji dekabrynda Türki dilleriň maşgalasynyň bütindünýä gününi belläp geçmek hakynda karar kabul edildi. Bu sene türki dilli halklaryň dil, medeni we taryhy birligini alamatlandyrar.
Başlangyjy Türkiýäniň Prezidenti Rejep Taýyp Ärdogan öňe sürdi we giň goldaw tapdy.
Türkiýäniň ÝUNESKO-daky hemişelik wekili Gülnur Aýbet karar bilen guramanyň köpdillilik, medeni dürlüligi we halklar arasyndaky dialogy pugtalandyrmak isleýändigini tassyklady. Ol Azerbaýjan, Gazagystan, Gyrgyzystan we Özbegistan bilen bilelikde başlangyjy goldaýan 26 döwlete, şol sanda Türkmenistanyň goldawyna hem minnetdarlyk bildirdi.
Dil diňe aragatnaşyk serişdesi däl, eýsem medeniýetiň ruhy, nesillerden nesillere geçýän durmuş tejribesi, akyl-paýhas we özboluşlylygyň goragçysydyr diýip, Aýbet sözüniň üstüne goşdy.
15-nji dekabryň saýlanyp alynmagy ýöne ýerden däl. Bu sene 1893-nji ýylda Orhon ýazgylaryny terjime etmekde iş bitiren daniýaly alym W. Tomseniň işleri bilen baglanyşdyryldy. Häzirki wagtda türki dillerinde dünýäde 200 milliondan gowrak adam gepleşýär we olar umumy medeni mirasa eýedirler.
