30–31-nji oktýabrda Italiýanyň Turin şäherinde Ýewropa Bileleşiginiň (ÝB) 10 million ýewro býujetlik “DARYA” maksatnamasynyň çäginde dördünji ýokary derejeli duşuşyk geçirildi. Oňa Merkezi Aziýa ýurtlarynyň hökümet wekilleri, halkara guramalar we bilermenler gatnaşdylar.
“DARYA” — Merkezi Aziýanyň ýaşlarynyň mümkinçiliklerini giňeltmäge, iş bazarynda talap edilýän professional başarnyklary ösdürmäge we sosial taýdan goşulyşmagy üpjün etmäge gönükdirilen ÝB-niň ilkinji sebitleýin taslamasydyr. Maksatnama 2022-nji ýylda başlandy we bäş ýyllyk möhlete niýetlenendir.
Duşuşyk Ýewropa Bilim Gaznasy tarapyndan guraldy we ol Türkmenistanyň, Gazagystanyň, Gyrgyzystanyň we Özbegistanyň bilim we zähmet ministrleriniň orunbasarlaryny, şeýle hem ÝB institutlarynyň we halkara hyzmatdaşlaryň wekillerini birleşdirdi.
Gazna ýolbaşçysy Pilwi Torsti ÝB bilen Merkezi Aziýa ýurtlarynyň köpýyllyk gatnaşyklarynyň berk we ynamly hyzmatdaşlyk öwrülendigini nygtady. Ol maksatnama öňe gidişlik görkezip, syýasy utgaşdyrylmagynyň gowulaşandygyny we bilim bilen iş bazarynyň arasyndaky baglanyşyklaryň berkidilendigini belledi.
ÝB-niň Merkezi Aziýa boýunça ýörite wekili Eduards Stipraýs taslamanyň strategik ähmiýetini nygtady. Onuň sözlerine görä, Merkezi Aziýa — dünýäniň iň ýaş sebiti bolup, ilatyň takmynan ýarysy 30 ýaşdan kiçidir. Başarnyklary ösdürmek durnukly ykdysady ösüşiň we maýa goýum çekmegiň açarydyr.
“Merkezi Aziýanyň ýaş nesli sebitiň iň uly baýlygy we geljekki umydydyr. Ortaça ýaş takmynan 26 ýaş, takmynan üçden bir bölegi 15 ýaşdan kiçidir. Merkezi Aziýa häzirki wagtda dünýäniň iň ýaş sebiti bolup galýar. 2050-nji ýyla çenli sebitiň ilatynyň takmynan 114 milliona ýetjekdigi çaklanylýar, olaryň üçden iki bölegi işe ukyply ýaşda bolar”.
Ol bilim we professional taýýarlygyň ýaşlara täze mümkinçilikleri açýandygyny, ynamy güýçlendirýändigini we üýtgeýän iş bazaryna uýgunlaşmaga kömek edýändigini belledi.
Duşuşyga gatnaşanlar Apro Formazione hünär taýýarlyk merkezine we dünýä meşhur Ferrero zawodyna baryp, Italiýanyň tejribesi — amaly okuw bilen innowasiýalary utgaşdyrmak — bilen tanyşdylar.
