29-njy oktýabrda Türkmenistanyň Awtomobil ulaglary ministrliginiň wekilleri bilen Ýaponiýanyň Sumitomo Corporation we Toyota Central Asia kompaniýalarynyň ýolbaşçylarynyň gatnaşmagynda onlaýn görnüşde tegelek stol duşuşygy geçirildi. Bu barada Türkmenistanyň Ýaponiýadaky ilçihanasynyň web sahypasynda habar berilýär.
Duşuşykda awtoulag tehnikasynyň üpjünçiliginde täze hyzmatdaşlyk mümkinçilikleri ara alnyp maslahatlaşyldy. Taraplar mundan öň taksi parky we jemgyýetçilik hyzmatlary üçin zerur bolan awtoulaglaryň üpjünçiliginde üstünlikli hyzmatdaşlygyň alnyp barlandygyny bellediler. Şeýle hem gatnaşyklary özara bähbitli esasda has-da pugtalandyrmagyň möhümdigi nygtaldy.
Gepleşikleriň dowamynda ulag pudagynda geljekki taslamalaryň mümkinçilikleri boýunça pikir alşyldy.
Duşuşygyň ahyrynda türkmen tarapy ýapon kompaniýalarynyň wekillerini «Halkara ulag geçelgeleri: özara baglanyşyk we ösüş — 2025» atly halkara maslahatyna we sergisine gatnaşmaga çagyrdy. Çäräniň 26–27-nji noýabrda Aşgabatda geçirilmegi göz öňünde tutulýar.
